Farmer short video || Strugles of farmer funny short video by bamma kathalu

అసిస్టెంటు : నమస్కారం .. నా పేరు రాంబాబు.. నేనో డబ్బున్న ఆయనకు అసిస్టెంటుగా పని చేస్తున్నా... ఆయన మరెవరో కాదు.. అదిగో.. ఆ దూరం నుంచి నడుచుకుంటూ వస్తున్నాడు.. చూసారా.. ఆయనే మా బాస్.. చాలా వెరైటీ మనిషీ.. 

(యజమాని దగ్గరకు వస్తాడు.)

అసిస్టెంటు : బాస్ ఇప్పుడు మనం ఎక్కడికి వెళ్తున్నాం..

యజమాని : రైతు బజార్‌కి, పదా..

అసిస్టెంటు : రైతు బజార్‌కా..?! మీకెందుకు శ్రమ.. ఏమైనా కూరగాయలు కావాలంటే చెప్పండీ.. నేనే వెళ్ళి తెచ్చేస్తాను.

యజమాని : నీకు సరిగ్గా బేరం ఆడటం చేతకావడం లేదు.. ఎలా బేరం చేయాలో నేను చూపిస్తాను పదా..

(అని ముందుకు నడుస్తాడు.)

అసిస్టెంటు : చెప్పానుగా ..వెరైటీ మనిషనీ.. అక్కడ ఏం పీకుతాడో చూద్దాం పదండి.

---------

(రైతు బజారులో... రైతు అమ్ముతూ , అరుస్తూ..)

రైతు : టమాటాలు కేజీ 30, బెండకాయలు కేజీ 50, వంకాయలు కేజీ 40, కొత్తిమీర కట్ట 10..

యజమాని : పేరుకే రైతుల బజారు.. కానీ ధరలు ఏంటయ్యా.. ఇంతిలా మండిపోతున్నాయి.. టమాటాలు 3 రూపాయలకీ, బెండకాయలు 5 రూపాయలకీ, వంకాయలు 4 రూపాయలకీ, కొత్తిమీర 1 రూపాయకీ రావా..

(అసిస్టెంటు రియాక్షన్‌)

రైతు : వస్తాయయ్యా.. కానీ కేజీ కాదు.. అరముక్కో, పావుముక్కో వస్తాయి.. ఇమ్మంటారా..

(అసిస్టెంటు గట్టిగా నవ్వుతాడు. )

యజమాని : అరముక్కో, పావుముక్కో నాకెందుకయ్యా.. నేను చెప్పిన ధరలకు కేజీ చొప్పున ఇస్తే చెప్పు.

రైతు : అప్పుడెప్పుడో రాయల వారి కాలంలో కూడా మీరు చెప్పిన ధరలకు అమ్మలేదు. 

(అసిస్టెంటు మళ్లీ గట్టిగా నవ్వుతాడు. )

యజమాని : నీకూ నాకూ ఎందుకొచ్చిన గొడవగానీ.. టమాటాలు కేజీ 10, బెండకాయలు కేజీ 30, వంకాయలు కేజీ 20, కొత్తిమీర కట్ట 3.. కి ఖాయం చేసుకో.. 

రైతు : రాదయ్యా.. కనీసం పండించిన ధర అయినా రాకపోతే నేనెలా అమ్మేదీ..

యజమాని : ఆ ప్రక్క వీధిలో ఉన్న షాపులో ఇస్తున్నారు కదా..

రైతు : మీరు చెప్పిన ధరకు ఇస్తుంటే అక్కడే కొనుక్కోండి.

అసిస్టెంటు : (కావాలనే ఏడిపిస్తూ) రండి సార్ పోయి అక్కడే కొనుక్కుందాం.. 

యజమాని : (చిన్నగా) అక్కడ ఏ షాపూ లేదూ.. నీవు సైలెంట్‌గా ఉండు..

 

యజమాని : 'కస్టమర్లే దేవుళ్లు' అనీ అప్పుడెప్పుడో గాంధీగారు చెప్పారు.. ఆయన మాటకు కూడా నీవు విలువ ఇవ్వడం లేదు కదయ్యా.. 

రైతు : ఆ మహాత్ముడు చెప్పింది దేవుళ్లులాంటి కస్టమర్ల గురించి..

అసిస్టెంటు : బా బాస్ దేవుడిలాండోడు కాదంటావ్.. (చిన్నగా)  చదువుకోకపోయినా బాగా చెప్పావు.

యజమాని : చివరిగా ఎంతకిస్తావో చెప్పు.. 

రైతు : ప్రతీ దానిమీద 5 రూపాయలు తగ్గించుకుని తీసుకోండి. కొత్తిమీర మాత్రం పది రూపాయిలే..

యజమాని : నేను అడిగినట్టు, నీవు చెప్పినట్టూ కాదు గానీ, ప్రతీ దానిమీద 10 రూపాయలు తగ్గించుకుని ఇచ్చేయ్.. కొత్తిమీర మాత్రం ఎనిమిది రూపాయిలే..

(ఇక చేసేది లేక రైతు బాధగా..)

రైతు : ఏం చేస్తామయ్యా.. ఎక్కువ కాలం నిల్వ ఉండటానికి ఇవి మీలాంటి పెద్దోళ్ల ఫ్యాక్టరీల్లో తయారైన వస్తువుల్లాంటివి కాదు.. పాడైపోతాయి.. నష్టం వచ్చినా తప్పదుగా తీసుకోండి.

(అసిస్టెంటు కూడా బాధ పడతాడు.)

యజమాని : నా టైం చాలా విలువైనది.. అందుకే ఎక్కువసేపు బేరం ఆడలేదు.. లేకుంటే ఫ్రీగా పట్టుకెళ్లేవాడిని.

అసిస్టెంటు : హమ్మా.. ఇంత డబ్బు ఈ విధంగా సంపాదించావా.. 

(రైతు కూరగాయలు ఇస్తాడు. ఏదో సాధించాననే గర్వంతో. .)

యజమాని : ఎప్పుడూ వాడు చెప్పిన ధరకే ఏదీ కొనకూడదు.. బేరం ఆడాలి.. అర్దమైందా..

అసిస్టెంటు : సరే బాస్.. (చిన్నగా) లేనోడు బేరాలు ఆడితే ఓ అర్థం ఉంది.. ఇలా ఉన్నోళ్లు కూడా బేరాలు ఆడితే ఎలా సామీ..!

--------------

(యజమాని, అసిస్టెంటు ఇద్దరూ పిజ్జా సెంటర్‌కి వెళతారు. యజమాని పిజ్జా తింటుంటాడు. అసిస్టెంటు చూస్తుంటాడు.) 

యజమాని : అసిస్టెంట్, బిల్లు ఎంతయిందో కనుక్కో.. 

అసిస్టెంటు : వెయిటర్.. బిల్లు ఎంత..?

వెయిటర్ : రెండు వందల యాభై..

(యజమాని : ఎప్పుడూ వాడు చెప్పిన ధరకే ఏదీ కొనకూడదు.. బేరం ఆడాలి.. అర్దమైందా.. అనే డైలాగ్ గుర్తొస్తుంది.)

అసిస్టెంటు : రెండు వందల యాభైనా.. రెండు వందలు తగ్గించి యాభై తీసుకో.. 

(అందరూ నవ్వుతున్న సౌండ్..)

వెయిటర్ : సార్.. ఇది ఇంటర్ నేషనల్ రెస్టారెంట్.. ఇక్కడ బేరాలు ఉండవ్..

అసిస్టెంటు : పోనీ ఇంకో యాభై వేసుకుని వంద తీసుకోవయ్యా.. 

(అందరూ నవ్వుతున్న సౌండ్..)

వెయిటర్ : చూసారా.. అందరూ మిమ్మల్ని చూసి నవ్వుతున్నారు.. మీరు ఇలాంటి రెస్టారెంట్‌కి రావడం ఫస్ట్ టైం అనుకుంటా..

(అందరూ నవ్వుతున్న సౌండ్.. యజమానికి కోపం వస్తుంది.. అసిస్టెంటుని ఒక్కటి పీకుతాడు)..

యజమాని : అందరి ముందూ నా పరువు తీసావు కదరా.. సారీ బాబూ.. 

(అని టేబుల్‌పై 300ల నోటు పెడతాడు.)

అసిస్టెంటు : అదేంటీ సార్.. బిల్లు 250 అయితే 300 పెట్టారు. 

యజమాని : పైది వాడి టిప్‌.. పదా..

(అసిస్టెంటు రియాక్షన్.)

----------

(తరువాత బైట..)

అసిస్టెంటు : బాస్.. ఒక్క నిముషం.. 

(యజమాని చూస్తాడు.)

అసిస్టెంటు : మీరెప్పుడు చూసినా రైతుల కోసం ఆ ప్రభుత్వాలు ఏం చేసాయి.. ఈ ప్రభుత్వాలు ఏం చేసాయనీ లెక్చర్లు ఇస్తుంటారు. ప్రభుత్వాల సంగతి తరువాత, ముందు మీరేం చేసారో చెప్పండి. 

అక్కడ కష్టపడి పంట పండించి మీ కడుపునింపే రైతును చాలా బాధ పెట్టారు.. ఇక్కడ టిప్పు అంటూ అడక్కపోయినా చాలా ఇచ్చారు. ఇదేం న్యాయం సార్..

వాళ్ళెవరో కాదు.. ముందు మీరు మారితే దేశంలో రైతుల ఆత్మహత్యలు సగం తగ్గిపోతాయి.

(యజమాని రియాక్షన్.)

అసిస్టెంటు : అయ్యా.. ఇంత డైలాగ్ చెప్పి యాక్షన్ లేకుంటే ఏం బావుంటుంది చెప్పండీ.. 

(అని యజమానిని ఒక్కటి పీకుతాడు)..

అసిస్టెంటు : ఇది రెస్టారెంట్‌లో నన్ను కొట్టినందుకు. 

(అని మరోటి పీకుతాడు)..

అసిస్టెంటు : ఇది ఆ రైతుని బాధపెట్టినందుకు..

(యజమాని రియాక్షన్.)

అసిస్టెంటు : అసలు నాకు ఎందుకు మండిందంటే .. నేను ఓ రైతు బిడ్డనే.. 

మనిషిని మనిషిగా.. రైతును రైతుగా చూసే మంచి బాస్‌ దగ్గర ఓ రూపాయి తక్కువకైనా పని చేస్తా .. వస్తా..

(అని అసిస్టెంటు వెళ్లిపోతాడు.. యజమాని షాక్‌తో చూస్తుటాడు.)